O‘zbekiston tumanida aholi bilan ochiq muloqotni ta’minlash, ularni qiynab kelayotgan muammolarni aniqlash va bartaraf etishga qaratilgan manzilli tadbirlar izchil davom etmoqda. Bugun tuman hokimi Ravshanbek Begmatov ishtirokida “O‘qchi” mahalla fuqarolar yig‘inida o‘tkazilgan navbatdagi sayyor qabul ham ayni shu maqsadga qaratildi. Qabulda tuman IIB boshlig‘i Sodirjon Abdullayev va halq qabulxonasi mudiri, tuman hokimining o‘rinbosarlari, mutasaddi tashkilot rahbarlari ham qatnashdi. Jarayonlarda fuqarolarning mahalla infratuzilmasini yaxshilash, bandlikni ta’minlash, tadbirkorlikni rivojlantirish, ijtimoiy yordam olish, davolanish, bank krediti va kadastr kabi masalalarga oid 30 ga yaqin murojaatlari batafsil ko‘rib chiqildi. Qabul davomida murojaatlarning ayrimlari o‘z yechimini topgan bo‘lsa, hal etilishi uchun muddat talab etiladigan masalalar mutasaddilarga qo‘shimcha o‘rganish uchun yo‘naltirilib, ijrosi qat’iy nazoratga olindi.