Bugun Qo‘qon shahrida Respublika ishchi guruhi a’zolari ishtirokida ommaviy sayyor qabul bo‘lib o‘tdi. Qo‘qon shahar va O‘zbekiston tumani aholisi uchun tashkillangan qabulda Prezident Xalq qabulxonalari, Oliy sud, Bosh prokuratura, Ichki ishlar, Adliya, Kambag‘allikni qisqartirish va bandlik, Maktabgacha va maktab ta’limi vazirliklari hamda boshqa qator markaziy idora va tashkilotlar mas’ul rahbarlari, shuningdek, viloyat, Qo‘qon shahar va O‘zbekiston tumani hokimliklari mutasaddilari ishtirok etdi. Qabul jarayonida fuqarolarning ijtimoiy-maishiy, huquqiy va boshqa dolzarb muammolari tinglandi. Har bir murojaat alohida ko‘rib chiqilib, aytilgan masalalar shu sohaga daxldor mutasaddilar ishtirokida batafsil muhokama qilindi. Murojaatlarning ba'zilari qabul chog‘ida o‘z yechimini topgan bo‘lsa, hal etilishi uchun muddat talab etiladigan masalalar bo‘yicha mutasaddilarga qo‘shimcha o‘rganish bo‘yicha tegishli topshiriqlar berilib, ijrosi qat’iy nazoratga olindi.