Bugun Yaypan shahridagi madaniyat uyida tuman hokimi Ravshanbek Begmatov, tuman prokurori Obidjon Sobirov va tuman davlat soliq inspeksiyasi rahbari Ulug‘bek Fozilov ishtirokida navbatdagi tadbirkorlar qabuli tashkil etildi. Ochiq muloqotda kichik va o‘rta biznes vakillarining taklif va muammolari eshitildi. Bank krediti olish, kadastr, soliq imtiyozlaridan foydalanish, tadbirkorlikni kengaytirish kabi masalalarda kelib tushgan qator murojaatlar tegishli mutasaddilar ishtirokida atroflicha ko‘rib chiqildi. Uchrashuv davomida hal etilishi mumkin bo‘lgan masalalarga amaliy yechimlar belgilandi. Qolgan murojaatlar qo‘shimcha o‘rganish uchun sohalar rahbarlariga yo‘naltirilib, ko‘rib chiqish va ijobiy yechim topish bo‘yicha vazifalar yuklatildi.