1. Bosh sahifa
2. Yangiliklar

Ўзбекистон туманида қарийб 13 минг аҳолига хизмат кўрсатувчи яна бир оилавий поликлиника капитал таъмирланиб, фойдаланишга топширилди

×

Ўзбекистон тумани “Зиё Нурсух” маҳалласида жойлашган 77-оилавий поликлиника жорий йилги инвестиция дастури доирасида капитал таъмирланиб, бугун фойдаланишга топширилди.

Тадбирда туман ҳокими Шерзоджон Юлдашев бошчилигидаги сектор раҳбарлари, тиббиёт ходимлари, маҳалла аҳли ва жамоатчилик иштирок этди. 

Барпо этилганига қарийб 50 йил бўлган мазкур муассасанинг мавжуд шароитлари ва инфратузилмасида вақтлар ўтиши билан кўплаб ноқулайликлар вужудга келган эди. Ана шу муаммоларни бартараф этиш мақсадида инвестиция лойиҳаси тайёрланиб, ижрога қаратилди.

Оилавий поликлиникани қайта реконструкция қилиб, бугунгидек кўркам қиёфага келиши учун қарийб 2 миллиард сўм миқдорида маблағ сарфланди. 

Тиббиёт маскани “Зиё Нурсух”, “Қўрғонча”, “Шўрқишлоқ”, “Бузуқўрғон” ва “Учбулак” маҳаллаларида яшовчи 12 минг 700 нафардан зиёд аҳолига тиббий хизмат кўрсатади.

2 қаватли 100 қатновга мўлжалланган мазкур тиббиёт муассасасида 9 нафар малакали шифокор ва 40 нафардан зиёд ўрта тиббиёт ходимлари фаолият олиб боради.

Муассаса замонавий тиббий жиҳозлар билан таъминланиб, тиббий хизмат сифатини янада яхшилаш йўлидаги барча қулай ва замонавий шароитлар яратилди.

Поликлиниканинг очилиш маросимида сўзга чиққанлар тиббиёт соҳасига берилаётган эътибор ва яратилаётган имкониятларни эътироф этишди.