1. Bosh sahifa
2. Yangiliklar

Ўзбекистон туманида яна бир эҳтиёжманд оила учун муносиб даромад манбаи яратиб берилди

×

Аввал хабар берилганидек, Ўзбекистон туманида ўндан зиёд оғир ижтимоий аҳволдаги оилалар хонадонлари таъмирланиб, улар учун муносиб даромад манбаи ҳам яратиб бериш чоралари кўрилмоқда. 

Бугун Яйпан шаҳар Абдурахмон Жомий номли мавзесида Хуршидахон Қодирова ва унинг синглиси Умидахон Қодирова учун қўзиқорин етиштириш лойиҳаси ўз эгаларига топширилди.

Вилоят ҳокими топшириғи асосида ушбу хайрли ишнинг ташаббускори ва кўмакчиси вилоят “Агробанк” акциядорлик тижорат банки бўлди.

Банк кўмаги билан Хуршидахон Қодирова оиласи учун кўп квартирали уйнинг ертўласида қўзиқорин етиштириш ва муносиб даромад топиши учун барча шароитлар муҳайё этилди.

Шу куни йиғилган маҳалла аёллари учун “Агробанк” АТ банки мутахассислари томонидан қўзиқорин етиштириш билан шуғулланишнинг қулайлик ва афзалликлари, ушбу бизнес орқали олинадиган даромад сирлари ҳақида батафсил тушунчалар берилди. 

Таъмирга муҳтож, оғир шароитда бўлган хонадонларни кўркам қиёфага келтириш, мазкур хонадон эгаларининг кўникмалари ва қизиқишларидан келиб чиқиб улар учун муносиб даромад манбаи яратиб бериш тадбирлари жадал давом этмоқда.