1. Bosh sahifa
2. Yangiliklar

Ташаббус самараси: “Шўрқишлоқ” маҳалласининг яна 3 километрдан зиёд ички йўллари янги қиёфа касб этди

×

Ўзбекистон туманида ташаббусли бюджет асосида олиб борилаётган ишлар ҳудудларнинг ижтимоий ва иқтисодий ҳолатини, маҳаллалар инфратузилмасини янада яхшилашга хизмат қиляпти. 

Мазкур лойиҳада ўз ташаббуслари билан фаол қатнашган маҳаллалардаги йўл, ичимлик сув, электр таъминоти билан боғлиқ муаммолар ўз ижобий ечимини топмоқда.

“Шўрқишлоқ” маҳалла фуқаролар йиғини аҳолиси ҳам мазкур лойиҳанинг жорий йилги биринчи мавсумида фаол иштирок этиб, ўз ташаббусларининг ғолиблар қаторидан ўрин олишига эришди. Бу эса маҳалладаги баъзи ички йўлларнинг таъмирга муҳтожлиги, ёзда чанг, қишда лой бўлишидек аҳолини узоқ йиллардан бери қийнаб келаётган муаммога ечим бўлди.

Маҳалла фаолларининг айни мақсад йўлида илгари сурилган ташаббуси 3 минг 445 та овоз тўплади. Президентимиз қарори асосида ушбу ташаббусни амалга ошириш учун 1 миллиард 200 миллион сўм маблағ йўналтирилди. Натижада эса лойиҳа доирасида маҳалладаги 6 та кўча бўйлаб 3 минг метрдан зиёд ички йўллар асфальтланди. 

Шунингдек, айни кунларда маҳалланинг яна 2 минг 800 метр ички йўллари давлатимиз раҳбарининг 2022 йил 25 октябрдаги 408-сонли қарори ижроси доирасида таъмирланиб, асфальтланмоқда. Мухтасар айтганда, шўрқишлоқликлар жорий йилнинг шу кунига қадар ўз маҳаллаларидаги қарийб олти минг метрли янги йўллардан фойдаланиш имкониятига эга бўлдилар.