1. Bosh sahifa
2. Yangiliklar

Ишсиз аёллар касаначиликка ўқитилмоқда

×

Ўзбекистон туманида ишсиз аёллар бандлигини таъминлашга кўмаклашиш мақсадида, улар касаначиликка ўқитилмоқда. 

Жорий йилнинг 21 сентябрь куни “Хотин-қизлар бандлигини ошириш ва саломатлигини мустаҳкамлашга оид қўшимча чора-тадбирлар тўғрисида”ги Президент қарори қабул қилинди.

Қарорга кўра, касаначиликни ривожлантириш орқали хотин-қизлар бандлигини таъминлаш бўйича “Фарғона тажрибаси”ни оммалаштириш, “Фарғона тажрибаси” бўйича касаначилик фаолиятини муваффақиятли йўлга қўйган тадбиркорлар томонидан маҳорат дарслари ташкил этиш белгиланган.

Шу асосда бугунги кунгача туман Оила ва хотин-қизлар бўлими ҳамда хотин-қизларни тадбиркорликка ўқитиш маркази томонидан ташкил этилган ўқув курсларида 45 нафар касаначиликка қизиқиши бор аёллар ўқитилиб, уларга сертификатлар топширилди.

Таъкидланишича, мазкур опа-сингилларнинг аксарияти “Аёллар дафтари” рўйхатига киритилган. 

Касаначилик фаолияти билан шуғулланишга лаёқати ва қизиқиши бор хотин-қизлар иштирокидаги ўқув курслари секторлар кесимида давом этмоқда.

Маълумот ўрнида, давлатимиз раҳбарининг юқорида қайд этилган қарори ҳамда Вазирлар Маҳкамасининг жорий йил 14 октябрдаги "Касаначиликни ташкил этган тадбиркорлик субъектларини янада қўллаб-қувватлаш чора-тадбирлари тўғрисида”ги қарори билан айни йўналишда қатор имтиёзлар белгиланган.