1. Bosh sahifa
2. Yangiliklar

Ўзбекистон туманида IT маркази фаолият бошлади

×

Ўзбекистон тумани Яйпан шаҳрида IT маркази фойдаланишга топширилди. 

Яйпан почта боғламаси биноси 2-қаватидаги хоналар туман ҳокимлиги томонидан қайта таъмирланган бўлса, Республика Ахборот технологиялари ва коммуникацияларини ривожлантириш вазирлиги томонидан зарур замонавий техник жиҳоз ва воситалар билан жиҳозланиб ана шундай марказ ташкил этилди. 

Ахборот технологиялари марказининг бугунги тантанали очилиш маросимида Ўзбекистон тумани ҳокими Шерзоджон Юлдашев, Ўзбекистон Республикаси Ахборот технологиялари ва коммуникацияларини ривожлантириш вазирининг ўринбосари Жамшид Эгамбердиев ҳамда кенг жамоатчилик вакиллари иштирок этди.

Вазирлик тизимидаги Тошкент шаҳридаги Инҳа университети, Тошкент ахборот технологиялари университети, Тошкент шаҳридаги Амити университети каби нуфузли олийгоҳлар ректорлари ҳамда юртимиздаги ушбу соҳанинг етук мутахассислари, дастурчилар туман ёшлари билан суҳбатлашиб, мастер-класслар ўтиб беришди.

Яйпандаги IT марказда малакали мутахассислар томонидан туман ёшлари компьютер саводхонлиги, веб-дастурлаш, веб-дизайн, график-дизайн, мобил иловалар яратиш, киберспорт, мобил робототехника, ахборот технологияларида инглиз тили ҳамда SMM (интернет маркетинги) билан ишлаш бўйича ўқитилади. 

Тумандаги “Темир дафтар”, “Аёллар ва ёшлар дафтарлари” рўйхатларига киритилган фуқаролар ва уларнинг фарзандлари ҳам ушбу марказда компьютер саводхонлиги ва ахборот-коммуникация соҳасида дастлабки кўникмаларини эгаллашлари бепул тарзда йўлга қўйилади.  

Йиғилганлар янги маскан фаолияти билан танишиб, туман аҳолиси ва ёшлари учун компьютер технологияларидан кенг ҳамда самарали фойдаланиш учун муносиб шарт-шароитлар яратилганлигини қайд этишди. 

Истиқболли ушбу соҳанинг келгусида тумандаги янада ривожи борасида фикрлар алмашилиб, олдинга яна кўплаб янги режа ва мақсадлар қўйилди.   

Ўзбекистон тумани ҳокимлиги Ахборот хизмати