1. Bosh sahifa
2. Yangiliklar

Сайёр қабулда бўстонликларнинг мурожаатлари ўрганилди

×

Ўзбекистон туманида аҳоли билан очиқ мулоқотни таъминлаш, уларни қийнаб келаётган муаммоларни аниқлаш ҳамда бартараф этиш юзасидан аниқ ва манзилли чоралар кўрилмоқда.

Шу мақсадда бугун туман сектор раҳбарлари ва Ўзбекистон Республикаси Олий Мажлис Қонунчилик палатаси депутати Мавлудахон Ходжаева иштирокида “Бўстон” маҳалла фуқаролар йиғинида сайёр қабул ўтказилди.

Фуқаролар қабули аввалида Олий Мажлис Қонунчилик палатаси депутати Мавлудахон Ходжаева миллий қонунчилигимиздаги янгиликлар, муҳим ўзгаришлар ҳақида сайловчиларга батафсил маълумотлар бериб, маҳалла аҳли билан мулоқот қилди. 

Қабул давомида куни-кеча айни маҳаллада ҳам республика ишчи гуруҳи томонидан олиб борилган ўрганишлар, аниқланган муаммолар ва уларни бартараф этиш чоралари ҳақида сўз борди. Ҳудудни оғир тоифадан чиқариш юзасидан режалаштирилган чора-тадбирлар ҳақида йиғилганларга маълум қилинди. 

Шу куни фуқароларни қийнаб келаётган турли муаммолар, хусусан моддий ёрдам, коммунал масалалар, фуқаролик паспорти олиш, қишлоққа банкомат ўрнатиш ва кадастрга оид мурожаатлари мутасаддилар томонидан тингланди. 

Ҳар бир мурожаатлар мазмунидан келиб чиқиб уларни ҳал этиш чоралари белгиланди. Ижобий ҳал этилиши учун муддат ва маблағ зарур бўлган муаммолар тегишли мутасаддиларга топширилиб, манзилли ўрганишлар ўтказилиши ва ижрога йўналтирилиши белгиланди.