1. Bosh sahifa
2. Yangiliklar

Ўзбекистон туманида Янгиланиш ва яшариш айёми – Наврўз олам кўтаринки руҳ ва катта шодиёна билан нишонланди

×

Ўзбекистон туманида “Ҳар кунинг Наврўз бўлсин, жонажон Ўзбекистоним!” деб номланган байрам тадбири бўлиб ўтди.

Янграган карнай-сурнай садолари, Деҳқон бобо, Наврўзой ва миллий либосдаги жарчилар барчани Наврўзи олам билан муборакбод этиб, байрам шодиёналарига чорлади.

Байрам шодиёналари ўтказилган Яйпан шаҳридаги “Ўзбекистон” ўйингоҳида миллий урф-одатларимиз, анъаналаримизни ўзида мужассам этган Наврўз айёми муносабати билан оммавий байрам сайли ташкил этилди. 

Намойиш этилган ҳунармандчилик маҳсулотлари, миллий либослар, шунингдек, миллий ва баҳорий таомлар кўргазмалари юртимиздаги тўкинлик, файзу бараканинг нишонаси бўлди. Дошқозонларда ош дамланиб, Наврўз дастурхонининг шоҳ таоми – сумалаклар тайёрланди.

Байрам тадбирини туман ҳокими Шерзоджон Юлдашев табрик сўзи билан очди. Барчани халқимизнинг қадим ва навқирон байрами – Наврўзи олам билан муборакбод этди.

“Ҳар йили Наврўз айёмини орзиқиб кутамиз. Чунки, энг азалий, миллий байрамимиз тимсолида минг йиллар давомида сақланиб келаётган халқимизнинг қадимий урф-одатлари, удумлари мужассамдир. Ушбу қутлуғ сана, шарқона янги йил билан сиз азизларни - нуроний отахон ва онахонларни, мунис ва меҳрибон опа-сингилларимизни, шижоатли ёшларни, бутун туманимиз аҳлини чин қалбимдан самимий табриклаб, энг эзгу тилакларимни изҳор этаман”, деди туман раҳбари ўз табрик сўзида.

Байрам саҳнасида намойиш этилган бадиий дастурлар, жажжи кичкинтойлар, сўз усталарининг чиқишлари, эл ардоғидаги санъаткорларнинг дилрабо тароналари барчага кўтаринкилик ва хуш кайфият улашди.

Концерт дастури сўнгида томошабинларга завқ-шавқ бағишловчи мушакбозлик томошалари уюштирилди.

Наврўз байрами шодиёналари туманнинг барча масканларида, меҳнат жамоалари, маҳаллаларида кўтаринкилик билан давом этмоқда.