1. Bosh sahifa
2. Yangiliklar

Бош Қомусимиз - эркин ва фаровон ҳаётимиз кафолати

×

Ўзбекистон Республикаси Конституцияси қабул қилинганлигининг 30 йиллиги Ўзбекистон туманининг барча масканларида кенг нишонланмоқда. 

Байрам муносабати билан тумандаги 23-сонли болалар мусиқа ва санъат мактабида тантанали маросим ўтказилди.

Унда сектор раҳбарлари, туман ҳокими ўринбосарлари, ҳуқуқни муҳофаза қилувчи органлар раҳбарлари, судлар раислари, туман фаоллари, ташкилот ва муассасалар, ўқувчи ёшлар ҳамда жамоатчилик вакиллари иштирок этди.

Тантанали маросимни туман ҳокимининг биринчи ўринбосари Хайрулло Алижонов кириш сўзи билан очиб, тадбир иштирокчиларини ва туман аҳолисини байрам билан табриклади ҳамда Конституциянинг ижтимоий-сиёсий аҳамияти, фуқароларимиз ҳаёти ва фаолиятида тутган ўрни хусусида тўхталди. 

Тадбирда Фуқаролик ишлари бўйича Ўзбекистон туманлараро суди раиси Элёр Исмоилов ҳам сўз олиб, Бош Қомусимизда ёшларнинг ҳуқуқ ва эркинлари кафолатлангани, фуқаролар манфаатлари муносиб ҳимоя қилинганига алоҳида тўхталди.

Шундан сўнг, Ўзбекистон Давлат мадҳияси иштирокчилар томонидан ижро этилди.

Маросимнинг бадиий қисмида 23-сонли болалар мусиқа ва санъат мактаби ўқувчилари ва ижодкорларнинг бадиий чиқишлари тадбир иштирокчилари эътиборига ҳавола қилинди.

Шунингдек, тадбир давомида бир гуруҳ туман ёшлари, вояга етган ўғил-қизларга ID-карта шаклидаги янги биометрик паспортларини тантанали топширилиши, уларнинг ёдида бир умрга ширин хотиралар билан қоладиган бўлди.